બેંક ઓફ બરોડાએ સોમવારે એટલે કે આજે પોતાના ગ્રાહકોને મોટી ભેટ આપી છે. બેંક દ્વારા જાહેરાત કરવામાં આવી હતી કે વાર્ષિક ધોરણે હોમ અને કાર લોન લેનારાઓ માટે વ્યાજ દર ઘટાડીને અનુક્રમે 6.50 ટકા અને સાત ટકા કરવામાં આવ્યો છે. એટલે કે હવે હોમ-કાર લોન પર ઓછું વ્યાજ ચૂકવવું પડશે. વ્યાજ દરોમાં ઘટાડા અંગેની જાહેરાત કરતા બેંકે કહ્યું કે આ સુવિધા મર્યાદિત સમય માટે છે અને 30 જૂન, 2022 સુધી લાગુ રહેશે.
આ સંદર્ભમાં જાહેર કરાયેલા એક અહેવાલમાં જણાવવામાં આવ્યું છે કે બેંક ઓફ બરોડાએ સોમવારે મર્યાદિત સમયગાળા માટે કાર લોન પર વ્યાજ દર 7.25 ટકાથી ઘટાડીને 7 ટકા કર્યો છે. નવી કારની ખરીદી માટે કન્સેશનલ પ્રોસેસિંગ ચાર્જની સાથે વાર્ષિક 7 ટકાથી શરૂ થતો નવો દર લાગુ થશે. એક નિવેદનમાં, બેંકે વધુમાં જણાવ્યું હતું કે તેણે 30 જૂન, 2022 સુધી મર્યાદિત સમયગાળા માટે પ્રોસેસિંગ ફી પણ ઘટાડીને રૂ. 1,500 (પ્લસ GST) કરી છે.
બેંકે તેના નિવેદનમાં એમ પણ કહ્યું કે જૂન 2022ના અંત સુધીમાં હોમ લોન માટે લોનના દરમાં 25 બેસિસ પોઈન્ટનો ઘટાડો કરીને 6.5 ટકા કરવામાં આવ્યો છે. આ દર લોનની તમામ રકમમાં ઉપલબ્ધ છે અને તે લેનારાની ક્રેડિટ પ્રોફાઇલ સાથે લિંક કરવામાં આવશે.
બેંકના જનરલ મેનેજર એચ.ટી. સોલંકીએ જણાવ્યું હતું કે પૂર્વ માલિકીની કાર અને ટુ-વ્હીલર લોન માટેનો વર્તમાન વ્યાજ દર યથાવત છે. પરંતુ આ ફેરફાર હોમ લોનના તમામ વ્યાજ દરો પર લાગુ થશે. તમામ રકમો માટે વ્યાજ દર સમાન રહેશે, જેનો લાભ 30 જૂન સુધી લઈ શકાશે.
નોંધનીય છે કે બેંક ઓફ બરોડાએ 12 એપ્રિલે ફંડ આધારિત ધિરાણ દર (MCLR)ના માર્જિનલ કોસ્ટમાં 5 બેસિસ પોઈન્ટનો વધારો કરવાની જાહેરાત કર્યા પછી આ રેટ કટ કરવામાં આવ્યો છે. પરંતુ હવે વ્યાજમાં ઘટાડો કરવાના નિર્ણયથી લોકોને થોડા સમય માટે મોટી રાહત મળી શકે છે. તે જ સમયે, MCLRમાં વધારા પછી, એક વર્ષનો MCLR 7.30 ટકાથી વધીને 7.35 ટકા થશે.
