કેન્દ્ર સરકાર અને રાજ્ય સરકારો લોકો માટે નવી યોજનાઓ રજૂ કરતી રહે છે. હવે સરકારે અમુક વિભાગો સાથે સંબંધિત પોર્ટલ પણ શરૂ કર્યા છે. હાલમાં, કેન્દ્ર સરકારે પ્રવાસી મજુરો માટે ઇ-શ્રમ પોર્ટલ શરૂ કર્યું છે. આ પોર્ટલ સંબંધિત એક મહત્વની જાહેરાત કરવામાં આવી છે. પ્રવાસી મજૂરોને 2 લાખ રૂપિયાનો મફત વીમો મળશે. શ્રમ અને રોજગાર મંત્રાલયે એક નિવેદનમાં કહ્યું છે કે પ્રવાસી મજૂરે ઈ-શ્રમ પોર્ટલ પર રજીસ્ટ્રેશન કરાવવાનું રહેશે. અને તેમનું ઈ-શ્રમ કાર્ડ ડાઉનલોડ કરવાનું રહેશે. જેથી અકસ્માત વીમો અને રોજગાર આધારિત સામાજિક સુરક્ષા યોજનાઓનો લાભ મળી શકે. કેન્દ્ર સરકારે 26 ઓગસ્ટના રોજ આ નવું પોર્ટલ શરૂ કર્યું હતું.
1 કરોડથી વધુ રજીસ્ટ્રેશન થયા: 26 ઓગસ્ટના રોજ લોન્ચ થયા પછી, એક કરોડથી વધુ અસંગઠિત કામદારોએ ઈ-શ્રમ પોર્ટલ પર પોતાની નોંધણી કરાવી છે. આ પોર્ટલ પર નોંધણી કરીને, પ્રવાસી મજુરો અને તેમના પરિવારોને આકસ્મિક મૃત્યુ અને કાયમી અપંગતાના કિસ્સામાં 2 લાખ રૂપિયા સુધીના વીમા માટે પાત્ર છે. આ સિવાય, આંશિક અપંગતાના કિસ્સામાં એક લાખ રૂપિયાની જોગવાઈ કરવામાં આવી છે.
અસંગઠિત ક્ષેત્રોમાં કામ કરતા પ્રવાસી મજૂરોનો મોટો હિસ્સો આવા ક્ષેત્રોમાં કામ કરે છે. આર્થિક સર્વેક્ષણ 2019-20 મુજબ, દેશમાં અંદાજે 38 કરોડ અસંગઠિત કામદારો છે, જેમને આ પોર્ટલ પર નોંધણી કરવાનું લક્ષ્ય રાખવામાં આવ્યું છે. શ્રમ અને રોજગાર મંત્રાલયે એક નિવેદનમાં કહ્યું છે કે પ્રવાસી મજુરો હવે ઇ-શ્રમ પોર્ટલ પર નોંધણી દ્વારા વિવિધ સામાજિક સુરક્ષા અને રોજગાર આધારિત યોજનાઓનો લાભ પણ લઇ શકશે.
