વધતી જતી મોંઘવારી અને શેરબજારમાં અસ્થિરતાને કારણે હવે સોનામાં રોકાણ વધી રહ્યું છે. ક્રિપ્ટોકરન્સીમાં ભારે ઘટાડાથી રોકાણકારો પણ સોના તરફ વળ્યા છે. વધતા ફુગાવામાં સોનું એ રોકાણનો સારો ઓપ્શન છે. ભારતમાં સોનામાં રોકાણ માટે ઘણા વિકલ્પો છે. જો તમારો ઈરાદો પણ સોનામાં રોકાણ કરવાનો છે, તો ચોક્કસપણે ધ્યાનમાં રાખો કે ટૂંકા ગાળામાં સોનામાંથી વળતરની અપેક્ષા નથી. તે લાંબા ગાળે સારો નફો કરાવતો વિકલ્પ છે.
લાઈવ મિન્ટના એક અહેવાલ મુજબ ફુગાવો મુખ્યત્વે બજારમાં વધુ કરન્સી આવવાનું પરિણામ છે. અમેરિકા અને ભારત સહિત ઘણા દેશોની સેન્ટ્રલ બેંકોએ કોરોના મહામારી દરમિયાન તેમના વ્યાજ દરોમાં નોંધપાત્ર રીતે ઘટાડો કર્યો છે. હવે વધતી જતી ફુગાવા પર લગામ લગાવવા માટે કેન્દ્રીય બેંકોએ તેમની નાણાકીય નીતિને ફરીથી કડક કરવી પડશે, જેથી રોકડ પ્રવાહમાં ઘટાડો થાય અને જો આ માંગ ઘટે તો ફુગાવા પર થોડો અંકુશ આવશે. બીજી તરફ સોનાનો પુરવઠો મર્યાદિત હોવાથી લોકો જ્યારે વધુ સોનું ખરીદે છે, ત્યારે તેની કિંમત વધી જાય છે.
ડેડ એસેટ છે સોનું
સોનાને ડેડ એસેટ કહેવાય છે. આમાં કરાયેલું રોકાણ બિઝનેસ સાથે સંબંધિત નથી. કંપનીને નફો મળે તેમ શેર્સમાં કરવામાં આવેલ રોકાણ વધે છે. પરંતુ સોનાની બાબતમાં આવું નથી. રોકાણકારને સોના પર કોઈ ડિવિડન્ડ મળતું નથી. સોના પર કોઈ વ્યાજ નથી. એવું ઘણી વખત બન્યું છે કે લાંબા ગાળા સુધી સોનામાંથી કોઈ વળતર મળતું નથી. તે જ સમયે, આ સમયગાળા દરમિયાન શેરબજારે સારું વળતર આપ્યું હતું. ઉદાહરણ તરીકે, વર્ષ 2021 પછી, જો નિફ્ટીએ 10.5 ટકાનો CAGR આપ્યો છે, તો સોનાનો CAGR 8.2 ટકા રહ્યો છે.
સોનામાં રોકાણ માટે ઘણા વિકલ્પો
સોનામાં રોકાણ કરવાના ઘણા વિકલ્પો છે. તમે બુલિયન માર્કેટમાંથી સોનાના ઘરેણા, સોનાના સિક્કા અથવા બિસ્કિટ ખરીદી શકો છો. તમે ગોલ્ડ સેવિંગ્સ ફંડ્સ અને ગોલ્ડ એક્સચેન્જ ટ્રેડેડ ફંડ્સ (ETFs)માંથી ગોલ્ડ યુનિટ ખરીદી શકો છો. આ સિવાય તમે સરકાર દ્વારા જારી કરાયેલા સોવરિન ગોલ્ડ બોન્ડ્સ (SGBs)માં પણ રોકાણ કરી શકો છો. સોનામાં રોકાણ કરવાના આ તમામ માધ્યમો સોનાની કિંમત સાથે જ જોડાયેલા છે. પરંતુ, દરેકનો હેતુ અલગ છે. જો તમે બુલિયન માર્કેટમાંથી સોનું લો છો, તો તમે તેને ઘરેણાં બનાવીને પહેરી શકો છો. જેઓ સોનામાં વેપાર કરવા માગે છે તેમના માટે ETF યોગ્ય છે. જે લોકો લાંબા સમય સુધી સોનામાં રોકાણ કરવા માગે છે તેમના માટે સોવરિન ગોલ્ડ બોન્ડ સારો વિકલ્પ છે, કારણ કે તેનો લોક-ઇન પિરિયડ 8 વર્ષનો છે.
શું ડિજિટલ સોનું લેવું યોગ્ય છે?
છેલ્લા કેટલાક સમયથી કેટલીક ફિનટેક કંપનીઓ રોકાણકારોને ડિજિટલ સોનું ખરીદવાની ઓફર પણ કરી રહી છે. ડિજિટલ સોનું એપમાંથી ખરીદવામાં આવે છે અને ભાગીદાર કંપનીની તિજોરીમાં રહે છે. પરંતુ, તે અનિયંત્રિત છે. ગયા વર્ષે જ સેબીએ ડિજિટલ ગોલ્ડને લઈને કંપનીઓ પર કડકાઈ કરી હતી, જેના પછી તેને ઘણું નુકસાન થયું છે. કોઈપણ પ્રકારના નિયમનની ગેરહાજરીને કારણે, ડિજિટલ સોનામાં રોકાણ કરવું ખૂબ જોખમી છે.
કેટલો લાગે છે ટેક્સ?
જો તમે બુલિયન માર્કેટમાંથી સોનું લો છો, તો તમારે 3 ટકાના દરે ગુડ્સ એન્ડ સર્વિસ ટેક્સ ચૂકવવો પડશે. સોવરિન ગોલ્ડ બોન્ડ્સ અને ETFs પર GST લાગુ પડતો નથી. જો તમે 3 વર્ષ પછી સોનું વેચો છો અને તમને નફો થાય છે તો તમારે તેના પર કેપિટલ ગેઈન ટેક્સ ચૂકવવો પડશે. તમારી આવક જે ટેક્સ સ્લેબમાં આવે છે તેના આધારે આ ટેક્સ વસૂલવામાં આવે છે. જો તમે ખરીદીની તારીખથી ત્રણ વર્ષથી વધુ સમય પછી સોનું વેચીને નફો કરો છો, તો તમારે 20 ટકાના દરે લોંગ ટર્મ કેપિટલ ગેઈન ટેક્સ ચૂકવવો પડશે. બુલિયન માર્કેટમાંથી ખરીદેલા સોના અને ઇટીએફ પર કેપિટલ ગેઇન ટેક્સ ચૂકવવાનો હોય છે. સોવરિન ગોલ્ડ બોન્ડ્સમાંથી થયેલા નફા પર આ ટેક્સ લાગતો નથી.
