Onion Export News: તાજેતરમાં ડુંગળીની વધતી કિંમતોને કાબૂમાં લેવા માટે સરકારે માર્ચ સુધી પ્રતિબંધની જાહેરાત કરી હતી. પરંતુ હવે રિટેલ માર્કેટમાં ડુંગળીના ભાવ ઘટ્યા બાદ કેન્દ્ર સરકાર ડુંગળીની નિકાસ પરનો પ્રતિબંધ હટાવવાની યોજના બનાવી રહી છે. ભારત ડુંગળીનો સૌથી મોટો નિકાસકાર છે, ઉત્પાદનમાં ઘટાડા બાદ ત્રણ મહિનામાં સ્થાનિક ભાવમાં વધારો થતાં 31 માર્ચ સુધી નિકાસ પર પ્રતિબંધ લાદવામાં આવ્યો હતો. સરકારના આ પગલાથી ડુંગળી ઉત્પાદક ખેડૂતો ભારે નારાજ છે.
ભાવ ઘટીને રૂ.1,500 પ્રતિ ક્વિન્ટલ થયો
એક મીડિયા રિપોર્ટમાં એવો દાવો કરવામાં આવ્યો હતો કે મુખ્ય ઉત્પાદક વિસ્તારોમાં ડુંગળીના ભાવ ઘટીને 2 થી 5 રૂપિયા પ્રતિ કિલો થઈ ગયા છે. છેલ્લા કેટલાક દિવસોમાં આવકમાં વધારો થવાને કારણે ભાવ ઘટીને 1,500 રૂપિયા પ્રતિ ક્વિન્ટલ થઈ ગયો છે.
સમાચાર મુજબ, નિકાસ પર પ્રતિબંધ લાદવામાં આવ્યા બાદ, મહારાષ્ટ્રના લાસલગાંવના જથ્થાબંધ બજારમાં કિંમત 60% ઘટી ગઈ છે. તમને જણાવી દઈએ કે રવિ પાકની સરખામણીએ ખરીફ પાકની શેલ્ફ લાઈફ ઓછી છે. આવક વધવાને કારણે ખરીફ પાકના ભાવમાં પણ ઘટાડો જોવા મળી રહ્યો છે.
25000 ટન ડુંગળીની ખરીદી કરી
બીજી તરફ ગ્રાહક બાબતોના સચિવ રોહિત કુમાર સિંહે જણાવ્યું હતું કે કેન્દ્રએ બફર સ્ટોક જાળવવા માટે 25,000 ટન ડુંગળીની ખરીદી કરી છે. સરકાર બફર સ્ટોક જાળવવા, સ્થાનિક પ્રાપ્યતા વધારવા અને કિંમતો પર નિયંત્રણ રાખવાના ઉદ્દેશ્ય સાથે ડુંગળીની ખરીદી કરી રહી છે. સરકારે નાણાકીય વર્ષ 2023-24 માટે બફર સ્ટોકનો લક્ષ્યાંક વધારીને સાત લાખ ટન કર્યો છે, જ્યારે ગયા વર્ષનો વાસ્તવિક સ્ટોક ત્રણ લાખ ટનનો હતો.
શું અસર થશે?
સરકાર દ્વારા બફર સ્ટોક વધારવાની અને ખરીફ પાકની વધતી આવકની સીધી અસર છૂટક બજારમાં ડુંગળીના ભાવ પર જોવા મળી રહી છે. છૂટક બજારમાં ડુંગળીનો ભાવ ઘટીને 25થી 30 રૂપિયા પ્રતિ કિલો થઈ ગયો છે.
અગાઉ નવેમ્બરમાં ડુંગળીના ભાવ 60થી 80 રૂપિયા પ્રતિ કિલો સુધી પહોંચી ગયા હતા. સરકાર ડુંગળીના વધતા ભાવથી સામાન્ય લોકોને રાહત આપવા અને ભવિષ્યમાં પણ ભાવ સ્થિર રહે તે સુનિશ્ચિત કરવાનો પ્રયાસ કરી રહી છે.
