સતત વધતી જતી મોંઘવારી વચ્ચે નાણાકીય બોજથી બચવા માટે વીમો એ જીવનનો આવશ્યક ભાગ બની ગયો છે. જીવન વીમો હોય કે આરોગ્ય વીમો હોય કે પછી વાહન વીમો, તે બધા જ આપણને આર્થિક કટોકટી સામે સુરક્ષા પૂરી પાડે છે. જો કોઈપણ વીમો ખરીદતી વખતે, આપણે અમુક ચોક્કસ બાબતોનું ધ્યાન રાખીએ તો વીમો સફળતાપૂર્વક ક્લેમ થઇ જતો હોય છે.
વાસ્તવમાં, વીમા કંપનીઓ જરૂરિયાતના સમયે નાની બાબતો પર દાવાને નકારી કાઢે છે. આનાથી પોલિસીધારકોને માત્ર મોટો આંચકો લાગે છે એટલું જ નહિ, પરંતુ તેમના પર બિનજરૂરી નાણાકીય બોજ પણ વધે છે. જો તમારે આ પરિસ્થિતિનો સામનો ન કરવો હોય તો વીમો ખરીદતી વખતે કેટલીક બાબતોનું ધ્યાન રાખો જેથી તમારો દાવો ક્યારેય નકારવામાં આવશે નહીં.
રિજેક્ટ થવાના ઘણા કારણો
ઈન્સ્યોરન્સ કન્સલ્ટન્ટ મનોજ જૈન કહે છે કે, જીવન વીમાના દાવાઓ નકારવાના ઘણા કારણો છે. આમાં દીર્ઘકાલીન રોગો અને હાલની નીતિઓની જાહેરાત ન કરવી, વ્યવસાય સંબંધિત ખોટી માહિતી આપવી જેવા ઘણા કારણો સામેલ છે. સામાન્ય વીમાના કિસ્સામાં, ભૂતકાળની સ્વાસ્થ્ય સમસ્યાઓની જાહેરાત ન કરવાથી પણ દાવો અસ્વીકાર થાય છે.
પોલિસી ખરીદતી વખતે આ બાબતોનું ધ્યાન રાખો
- જરૂરિયાત મુજબ જ ઉત્પાદન ખરીદો.
- પોલિસી સંબંધિત બ્રોશર ધ્યાનથી વાંચો.
- પ્રપોઝલ ફોર્મ ભરતી વખતે તમામ પ્રશ્નોના સાચા જવાબ આપો.
- ઊંચું વળતર, બોનસ, લોન, સોનાના સિક્કા જેવી ઑફર્સથી લલચાશો નહીં. જ્યારે શંકા હોય, ત્યારે વીમા કંપનીની ગ્રાહક સેવાને કૉલ કરો અને તપાસો.
- વિશ્વાસપાત્ર સ્ત્રોતમાંથી અથવા ઓનલાઈન વીમા પોલિસી ખરીદો.
- વીમા કંપની તરફથી વેરિફિકેશન કોલને ધ્યાનથી સાંભળીને તમામ પ્રશ્નોના સાચા જવાબ આપો.
