પેટ્રોલની ચિંતા છોડો ઇલેક્ટ્રિક બાઇક પર સરકાર આપશે સબસીડી, જાણો કેટલી સબસિડી મળશે

દેશવાસીઓને આજે શુક્રવારે વહેલી સવારે મોંઘવારીનો ઝટકો લાગ્યો છે. ઓઈલ માર્કેટિંગ કંપનીઓએ આજથી પેટ્રોલ અને ડીઝલના ભાવમાં વધારો ઝીંક્યો છે. દેશભરમાં પેટ્રોલ અને ડીઝલના ભાવમાં ત્રણ રૂપિયાથી વધુનો વધારો થયો છે. આ ભાવવધારા બાદ અમદાવાદમાં પેટ્રોલનો ભાવ વધીને 97.49 રૂપિયા પ્રતિ લિટર થઈ ગયો છે, જ્યારે ગાંધીનગરમાં 97.95 રૂપિયા, વડોદરામાં 97.60 રૂપિયા, સુરતમાં 97.35 રૂપિયા, રાજકોટમાં 97.29 રૂપિયા પ્રતિ લિટર પેટ્રોલનો ભાવ પહોંચી ગયો છે.

શું તમે ઈલેક્ટ્રિક સ્કૂટર લેવાનું વિચારી રહ્યા છો? - જો તમે પણ પેટ્રોલના ભાવ વધારાથી ચિંતિત છો અને ઈલેક્ટ્રિક સ્કૂટર લેવાનું વિચારી રહ્યા છો. તો આ સમાચાર તમારા માટે ઘણા મહત્વના છે. આજે અમે આપને ઈલેક્ટ્રિક સ્કૂટર પર સરકાર તરફથી મળતી સબસિડી વિશે જણાવવા જઈ રહ્યા છીએ. જી હાં, લોકો પેટ્રોલના બદલે ઈલેક્ટ્રિક વાહન વધારે ખરીદે તે માટે કેન્દ્ર સરકાર દ્વારા પીએમ ઈ-ડ્રાઈવ (PM E-DRIVE) યોજના હેઠળ સબસિડી આપવામાં આવે છે

ઈલેક્ટ્રિક સ્કૂટર પર કેટલી સબસિડી મળે છે? - સરકાર દ્વારા ઈલેક્ટ્રિક સ્કૂટર માટે સબસિડીની સમયમર્યાદા 31 જુલાઈ સુધી લંબાવવામાં આવી છે. હવે આપણે જાણીએ કે ઈલેક્ટ્રિક સ્કૂટર પર સરકાર તરફથી કેટલી સબસિડી મળે છે, સરકાર દ્વારા પ્રતિ kWh પર 2500 રૂપિયાની સબસિડી (2500 રૂપિયાનું ડિસ્કાઉન્ટ) મળે છે. વાહન દીઠ કુલ સબસિડી 5000 રૂપિયા સુધી મર્યાદિત કરવામાં આવી છે. આ લાભ ફક્ત 1.5 લાખ રૂપિયાથી ઓછી એક્સ-ફેક્ટરી કિંમતવાળા ઈલેક્ટ્રિક સ્કૂટર અથવા ઈલેક્ટ્રિક બાઇક પર મળે છે.

આ ઉપરાંત ગુજરાતમાં વિદ્યાર્થીઓ માટેની ઈ-બાઈક સહાય યોજના (GEDA EV Subsidy Scheme) હેઠળ ઇલેક્ટ્રિક સ્કૂટર ખરીદવા પર અમુક શરતો હેઠળ ₹12,000ની ફ્લેટ સબસિડી (નાણાકીય સહાય) મળવાપાત્ર છે. આ યોજનાનો મુખ્ય ઉદ્દેશ્ય પ્રદૂષણ ઘટાડવાનો અને વિદ્યાર્થીઓમાં ગ્રીન એનર્જી પ્રત્યે જાગૃતિ લાવવાનો છે. ગુજરાતની શાળામાં ધોરણ-12માં અભ્યાસ કરતા અથવા કોલેજમાં ભણતા વિદ્યાર્થીઓ આ યોજનાનો લાભ લઈ શકે છે. આ યોજના માટે કોઈ પણ પ્રકારની વ્યક્તિગત કે કૌટુંબિક આવક મર્યાદા નથી.

RTO ટેક્સમાં કેટલી મળે છે રાહત? - ગુજરાતમાં ઈલેક્ટ્રિક વાહનોના વેચાણને વેગ આપવા માટે રાજ્ય સરકાર દ્વારા પણ વિવિધ લાભો આપવામાં આવી રહ્યા છે. જેમાં ઈલેક્ટ્રિક વાહનને ખરીદતી વખતે RTO ટેક્સમાં 5 ટકાની રાહત આપવામાં આવે છે. એટલે કે ગુજરાતમાં ઈલેક્ટ્રિક વાહનની ખરીદી પર 6 ટકાને બદલે 1 ટકા જ ટેક્સ ચૂકવવો પડે છે.

કઈ-કઈ કંપનીઓ વેચે છે ઈલેક્ટ્રિક સ્કૂટર? - ગુજરાત સહિત ભારતમાં હાલમાં ગણી કંપનીઓ ઈલેક્ટ્રિક સ્કૂટરનું વેચાણ કરી રહી છે. જેમાં TVS Motor કંપનીના TVS iQube, TVS iQube ST જેવા મોડલ સામેલ છે. જ્યારે OLA ઈલેક્ટ્રિક કંપનીના Ola S1 Pro, Ola S1 X, Ola S1 Air, Bajaj ઓટો કંપનીનું બજાજ ચેતક, એથર એનર્જી કંપનીના Ather 450X, Ather Rizta, હીરો કંપનીના Vida V1, Vida VX2 સ્કૂટર્સ સામેલ છે