જ્યોતિષ અનુસાર કુંભ રાશિવાળામાં અનેક ગુણો હોય છે કારણ કે આ રાશિ વાયુ તત્વની ગણવામાં આવે છે. કુંભ રાશિના લોકો સામાન્ય રીતે આત્મનિર્ભર, હોશિયાર, બુદ્ધિમાન અને આશાવાદી હોય છે. સફળતા પ્રાપ્ત કરવા માટે તેઓ ખૂબ મહેનત કરતા હોય છે અને તેમને નવી નવી સર્જનાત્મક બાબતો પર કામ કરવામાં બહુ જ રસ હોય છે. નકારાત્મક બાબતોથી તેઓ દૂર જ રહેતા હોય છે. કુંભ રાશિના લોકોમાં કેટલીક ખામીઓ પણ હોય છે તો આવો જાણીએ કુંભ રાશિના લોકોની ખૂબીઓ અને ખામીઓ વિશે.
આગળ કહ્યું એ પ્રમાણે કુંભ રાશિવાળા લોકોમાં સકારાત્મક દ્રષ્ટિકોણ હોય છે. ઉપરાંત તેઓ ન્યાયપ્રિય પણ હોય છે. તેમને પોતાના શૈક્ષણિક કાર્યમાં પણ બહુ રસ પડતો હોય છે. નવી નવી બાબતો શીખવામાં તેમને રસ પડતો હોય છે. પોતાની દરેક સમસ્યાનું સમાધાન શોધી લેવાની કુશળતાને લીધે દરેક વ્યક્તિના ગમતા થઇ જવામાં તેઓ માહેર હોય છે. તેઓમાં સારા નેતૃત્વના ગુણો પણ હોય છે અને પડકારોને સ્વીકારવામાં તેઓ ક્યારેય ગભરાતા નથી.
બીજી તરફ કુંભ રાશિના લોકોમાં કેટલીક ખામીઓ પણ હોય છે. એકને એક કાર્ય કરવામાં તેમને રસ પડતો નથી, કોઈ કાર્ય કરીને તેઓ જલ્દી કંટાળી જાય છે. તેમને નાની નાની બાબતોમાં બહુ ગુસ્સો આવી જાય છે. કેટલાકનો સ્વભાવ તો ચીડિયો પણ હોય છે. બીજાની સલાહની અવગણના કરવાની પણ બહુ જ ટેવ હોય છે. તેમના આવા સ્વભાવને લીધે તેમની લાગણીઓ પણ અનેક વખત દુભાઈ જતી હોય છે.
જો તેઓ પોતાની આ ખામીઓને દૂર કરવાનો પ્રયત્ન કરે તો તેઓ ચોક્કસ પ્રગતી કરે એટલું જ નહિ, પણ સફળતાના શિખરો સર કરી શકે. પોતાના જીવનના નક્કી કરેલા ઉચ્ચતમ ધ્યેયો સુધી તેઓ બહુ જ સરળતાથી પહોંચી શકે.
