રિઝર્વ બેંક ઓફ ઈન્ડિયા (RBI) દ્વારા રેપો રેટમાં વધારો કર્યા બાદ લોન પરના વ્યાજ દરમાં વધારો કરવા ઉપરાંત બેંક ડિપોઝિટ પરના વ્યાજ દરો પણ વધવા લાગ્યા છે. દરમિયાન, ખાનગી ક્ષેત્રની IDFC ફર્સ્ટ બેંક અને ઇક્વિટાસ સ્મોલ ફાઇનાન્સ બેંકે ફિક્સ્ડ ડિપોઝિટ એટલે કે FDs પર વ્યાજદરમાં વધારો કર્યો છે.
IDFC ફર્સ્ટ બેન્કે રૂ. 2 કરોડથી નીચેની FD પર વ્યાજ દરમાં વધારો કર્યો છે. 7 દિવસથી 10 વર્ષમાં પાકતી થાપણો માટે, બેંક 3.5 ટકાથી 7.00 ટકા વ્યાજ દર ઓફર કરે છે. IDFC ફર્સ્ટ બેંક હાલમાં 18 મહિના 1 દિવસથી 3 વર્ષ (549 દિવસથી 3 વર્ષ)માં પાકતી થાપણો પર મહત્તમ 7.75 ટકા વ્યાજ ઓફર કરે છે. બેંકના નવા દરો 1 માર્ચ, 2023થી લાગુ થશે.
IDFC ફર્સ્ટ બેંક એફડી દરો
બેંક હવે 7 થી 29 દિવસમાં પાકતી FD પર 3.50 ટકા વ્યાજ દર અને 30 થી 45 દિવસમાં પાકતી થાપણો પર 4.00 ટકા વ્યાજ દર ઓફર કરી રહી છે. બેંક હવે 46-90 દિવસની થાપણો પર 4.50 ટકા અને 91-180 દિવસની થાપણો પર 5.00 ટકાના દરે વ્યાજ ઓફર કરી રહી છે. 181 દિવસથી 366 દિવસમાં પાકતી થાપણો પર હવે 6.75 ટકા વ્યાજ મળશે અને 367 દિવસથી 18 મહિના (367 દિવસથી 548 દિવસ)માં પાકતી FD પર હવે 7.25 ટકા વ્યાજ મળશે.
888 દિવસની FD પર 8.20% વ્યાજ
ઇક્વિટાસ સ્મોલ ફાઇનાન્સ બેંકના નવા FD દરો 1 માર્ચ, 2023થી અમલમાં આવ્યા છે. બેંકે કહ્યું કે તેના ગ્રાહકો 888 દિવસના સમયગાળા માટે રૂ. 2 કરોડથી ઓછીની FD પર 8.20 ટકા વ્યાજ મેળવી શકશે. 12 મહિનાથી 24 મહિના સુધીના સમયગાળા માટે રોકાણ પર વ્યાજ દરમાં પણ વધારો કરવામાં આવ્યો છે. ઇક્વિટાસ સ્મોલ ફાઇનાન્સ બેંકે ફાઇલિંગમાં જણાવ્યું છે કે વ્યાજની ચુકવણી તમામ પ્રકારના ખાતાઓમાં ત્રિમાસિક ધોરણે ચાલુ રહેશે. ઘરેલું વરિષ્ઠ નાગરિકોને FD અને RD દરો પર 0.50 ટકા વધારાનું વ્યાજ મળશે.
ઘણી બેંકોએ એફડીના દરમાં વધારો કર્યો છે
ઉલ્લેખનીય છે કે, 8 ફેબ્રુઆરીએ RBIએ રેપો રેટમાં 0.25 ટકાનો વધારો કર્યો હતો. રેપો રેટમાં વધારા બાદ દેશની ઘણી સરકારી અને ખાનગી બેંકોએ તેમના એફડી દરમાં વધારો કર્યો છે. SBI, ICICI બેંક, HDFC બેંક, યસ બેંક જેવી ઘણી બેંકોએ તાજેતરના સમયમાં FD પર વ્યાજ વધાર્યું છે.
