પોસ્ટ ઓફિસ નિવૃત્તિ અને તે પહેલાંના જીવન માટે ઘણી રોકાણ યોજનાઓ ચલાવે છે. જેમાં રોકાણ કરીને તમે તમારી ભવિષ્યની જરૂરિયાતોને પૂરી કરવા માટે સારી એવી રકમ ઉમેરી શકો છો. જો તમે પણ તમારી નિવૃત્તિ વિશે ચિંતિત છો, તો પોસ્ટ ઓફિસની પબ્લિક પ્રોવિડન્ટ ફંડ સ્કીમ તમારા માટે સારો વિકલ્પ બની શકે છે. કારણ કે આ સ્કીમમાં નાની ડિપોઝિટ લાંબા ગાળે મજબૂત ફંડ ઉમેરી શકે છે. જેમાં આવકવેરામાં છૂટ પણ મળે છે. ચાલો જાણીએ કે, 35 વર્ષની વય વટાવ્યા પછી પણ, તમે કેવી રીતે નિવૃત્તિ સુધી મોટું ભંડોળ એકઠું કરી શકો છો.
25 વર્ષમાં 41 લાખનું ફંડ હશે - તમે પોસ્ટ ઓફિસમાં પીપીએફ ખાતામાં વાર્ષિક વધુમાં વધુ એક લાખ 50 હજાર રૂપિયાનું રોકાણ કરી શકો છો. જેના પર વાર્ષિક 7.1 ટકા વ્યાજ મળે છે. જો તમે 35 વર્ષની ઉંમરથી માસિક 5 હજાર રૂપિયાનું રોકાણ કરો છો, તો એક વર્ષમાં 60000 હજાર રૂપિયાનું રોકાણ થશે.
જ્યારે પીપીએફમાં પાકતી મુદત 15 વર્ષ છે, જે 5-5 વર્ષ માટે બે વાર લંબાવવામાં આવે છે. એટલે તમારા ખાતામાં 25 વર્ષમાં પ્રિન્સિપલ + વ્યાજની રકમ 41,23,206 લાખ રૂપિયા થશે. જેમાં 15 લાખનું રોકાણ અને 26.23 લાખનું વ્યાજ મળશે.
PPFમાં કરેલું રોકાણ સુરક્ષિત છે - ઘણા લોકો રોકાણ કરતા પહેલા તેની સુરક્ષાને લઈને ચિંતિત હોય છે. અહીં તમને જણાવી દઈએ કે PPFમાં કરવામાં આવેલું રોકાણ સંપૂર્ણપણે સુરક્ષિત છે. પોસ્ટ ઓફિસ સિવાય તમે બેંકમાં પીપીએફ ખાતું પણ ખોલાવી શકો છો. જ્યાં તમને સમાન વ્યાજ મળશે.
આ યોજનાનો સૌથી મોટો ફાયદો એ છે કે તે આવકવેરા કાયદાની કલમ 80C હેઠળ કર લાભો પ્રદાન કરે છે. આમાં, સ્કીમમાં 1.5 લાખ રૂપિયા સુધીના રોકાણ પર કપાત લઈ શકાય છે. પીપીએફમાં મળતું વ્યાજ અને પાકતી મુદતની રકમ પણ કરમુક્ત છે. આમ, PPFમાં રોકાણ EEE કેટેગરીમાં આવે છે. સૌથી અગત્યનું, સરકાર નાની બચત યોજનાઓને સ્પોન્સર કરે છે તેથી, સબ્સ્ક્રાઇબર્સને આમાં રોકાણ પર સંપૂર્ણ સુરક્ષા મળે છે.
