khissu.com@gmail.com

khissu

દશેરા પહેલા સરકારની મોટી ભેટ, હવે પોસ્ટ ઓફિસની આ યોજનાઓ પર મળશે વધુ વ્યાજ

તહેવારોની સિઝનમાં કેન્દ્ર લોકોને  સ્મોલ સેવિંગ સ્કીમ પર મોટી ભેટ આપી છે. સરકારે ત્રીજા ક્વાર્ટર માટે આ યોજનાઓ પર નવા વ્યાજ દરો જાહેર કર્યા છે. કેટલીક નાની બચત યોજનાઓ પર 0.3 ટકા સુધીનો વધારો થયો છે. ઉપરાંત, એક સ્કીમની પાકતી મુદતમાં ફેરફાર કરવામાં આવ્યો છે. રિઝર્વ બેંક ઓફ ઈન્ડિયા (RBI) રેપો રેટમાં સતત વધારો કરી રહી છે.  આને ધ્યાનમાં રાખીને સરકારે સ્મોલ સેવિંગ્સ સ્કીમમાં જમા રકમ પર વ્યાજમાં વધારો કર્યો છે. સરકારે 27 મહિના પછી નાની બચત યોજનાઓના વ્યાજ દરમાં વધારો કર્યો છે.

ત્રણ વર્ષ માટે રોકાણ પર વ્યાજમાં વધારો
નવા દરો અનુસાર, પોસ્ટ ઓફિસમાં ત્રણ વર્ષ સુધી જમા રકમ પર હવે 5.8 ટકા વ્યાજ મળશે. અગાઉ તે 5.5 ટકા હતો. બે વર્ષની થાપણો પર વ્યાજ દર 5.5 ટકાથી વધારીને 5.7 ટકા કરવામાં આવ્યો છે. તે જ સમયે, સિનિયર સિટીઝન સેવિંગ સ્કીમ (SCSS) પર હવે 7.6 ટકાના દરે વ્યાજ મળશે.  અત્યાર સુધી આ સ્કીમ પર રોકાણકારોને 7.4 ટકાના દરે વ્યાજ મળતું હતું.

કિસાન વિકાસ પત્રના નિયમોમાં ફેરફાર
પોસ્ટ ઓફિસની લોકપ્રિય યોજના કિસાન વિકાસ પત્રમાં રોકાણ કરનારાઓ માટે બે ફેરફારો કરવામાં આવ્યા છે. આ યોજના પર ઉપલબ્ધ વ્યાજ દરમાં વધારા સાથે, કિસાન વિકાસ પત્રની પાકતી મુદતમાં ઘટાડો કરવામાં આવ્યો છે.  કિસાન વિકાસ પત્ર યોજનામાં રોકાણ કરનારાઓને હવે થાપણો પર 7.0 ટકાના દરે વ્યાજ મળશે.  તે જ સમયે, આ યોજના હવે 124 મહિનાને બદલે 123 મહિનામાં પરિપક્વ થશે.  માસિક આવક ખાતાની યોજના પર ઉપલબ્ધ વ્યાજ દર 6.6% થી વધારીને 6.7% કરવામાં આવ્યો છે.

નવા દરો 1 ઓક્ટોબરથી લાગુ થશે
નાણા મંત્રાલયના નિવેદન અનુસાર, નાણાકીય વર્ષ 2022-23ના ત્રીજા ક્વાર્ટર માટે આ બચત યોજનાઓના વ્યાજ દરોમાં ફેરફાર કરવામાં આવ્યો છે. ત્રીજું ક્વાર્ટર 1 ઓક્ટોબર, 2022થી શરૂ થશે અને 31 ડિસેમ્બર, 2022ના રોજ સમાપ્ત થશે. સરકાર દર ત્રણ મહિને બચત યોજનાઓના વ્યાજ દરોની સમીક્ષા કરે છે. આ વખતે 27 મહિના બાદ આ સ્કીમ્સ પર વ્યાજદરમાં વધારો કરવામાં આવ્યો છે.

જોકે, સરકારે પબ્લિક પ્રોવિડન્ટ ફંડ (PPF), નેશનલ સેવિંગ્સ સર્ટિફિકેટ અને સુકન્યા સમૃદ્ધિ યોજના પર મળતા વ્યાજમાં કોઈ ફેરફાર કર્યો નથી.  રિઝર્વ બેંક દ્વારા સતત વધી રહેલા રેપો રેટના કારણે સરકારે બચત યોજનાઓ પર વ્યાજમાં વધારો કર્યો છે. એવી ધારણા છે કે રિઝર્વ બેંક ફરી એકવાર રેપો રેટમાં વધારો કરી શકે છે.