Gold Price Today: સોનાના ભાવમાં ઘટાડો જોવા મળી રહ્યો છે. આ ઉપરાંત સપ્તાહના પ્રથમ દિવસે ચાંદી પણ સસ્તી થઈ છે. વૈશ્વિક બજારમાં કિંમતી ધાતુઓની ઘટતી કિંમતો વચ્ચે દિલ્હી બુલિયન માર્કેટમાં પણ સોનું સસ્તું થયું છે. આજે સોનાનો ભાવ 63,000ની આસપાસ બંધ થયો છે. આ સિવાય ચાંદીનો ભાવ 76,000ની આસપાસ બંધ થયો છે. HDFC સિક્યોરિટીઝે આ અંગે માહિતી આપી છે.
રાષ્ટ્રીય રાજધાનીના બુલિયન માર્કેટમાં સોમવારે સોનું 250 રૂપિયા ઘટીને 63,200 રૂપિયા પ્રતિ 10 ગ્રામ પર આવી ગયું. અગાઉના ટ્રેડિંગ સેશનમાં સોનું રૂ. 63,450 પ્રતિ 10 ગ્રામ પર બંધ થયું હતું. ચાંદીનો ભાવ પણ રૂ. 400 ઘટીને રૂ. 76,300 પ્રતિ કિલો બંધ રહ્યો હતો. અગાઉના ટ્રેડિંગ સેશનમાં ચાંદી રૂ.76,700 પ્રતિ કિલોગ્રામ પર બંધ થઈ હતી. અમદાવાદમાં આજે 24 કેરેટ સોનાના એક તોલાના ભાવ 64,165 રૂપિયા ચાલી રહ્યાં છે.
એમસીએક્સ પર પણ સોનું સસ્તું થયું
આ સિવાય આજે એમસીએક્સ પર પણ સોનું સસ્તું થયું છે. MCX પર સોનાની કિંમત 0.95 ટકા ઘટીને 61960 રૂપિયા પ્રતિ 10 ગ્રામ છે. આ સિવાય ચાંદી 0.81 ટકા ઘટીને 72001 રૂપિયા પ્રતિ કિલો પર છે. MCX ફ્યુચર્સ ટ્રેડિંગમાં સોનાના ફેબ્રુઆરી કોન્ટ્રેક્ટનો ભાવ 355 રૂપિયા ઘટીને 62,202 રૂપિયા પ્રતિ 10 ગ્રામ થયો હતો. આ સિવાય ચાંદીનો માર્ચ કોન્ટ્રાક્ટનો ભાવ રૂ. 415 ઘટીને રૂ. 72,172 પ્રતિ કિલો થયો હતો.
નિષ્ણાતનો અભિપ્રાય શું છે?
એચડીએફસી સિક્યોરિટીઝના વરિષ્ઠ વિશ્લેષક (કોમોડિટી) સૌમિલ ગાંધીએ જણાવ્યું છે કે યુએસ લેબર માર્કેટના મજબૂત ડેટા પછી, રોકાણકારોમાં એવો ભય વધી ગયો છે કે ફેડરલ રિઝર્વ વ્યાજ દરમાં ઘટાડો કરવામાં વિલંબ કરી શકે છે. આના કારણે સોનાના ભાવમાં ઘટાડો થયો હતો.કોમોડિટી માર્કેટમાં સોનું ઔંસ દીઠ $2,029 હતું, જે આંતરરાષ્ટ્રીય બજારમાં અગાઉના બંધ કરતાં US $16 ઓછું છે.
મોતીલાલ ઓસ્વાલ ફાઇનાન્શિયલ સર્વિસિસના સિનિયર વાઇસ પ્રેસિડેન્ટ (કોમોડિટી રિસર્ચ) નવનીત દામાણીએ કહ્યું છે કે આ અઠવાડિયે યુએસ કન્ઝ્યુમર પ્રાઇસ ઇન્ડેક્સ (CPI) અને પ્રોડ્યુસર પ્રાઇસ ઇન્ડેક્સ (PPI) ડેટા પર ધ્યાન કેન્દ્રિત કરવામાં આવશે. આનાથી ફેડરલ રિઝર્વની નાણાકીય નીતિને લગતી સ્થિતિ વધુ સ્પષ્ટ થશે.આંતરરાષ્ટ્રીય બજારોમાં સોનું ઘટીને $2,029 પ્રતિ ઔંસ અને ચાંદી ઘટીને $22.95 પ્રતિ ઔંસ થઈ હતી.
