ગુજરાતના વાતાવરણમાં સતત પલટો આવી રહ્યો છે. એક તરફ શિયાળાની સિઝનમાં પણ ગરમીનો અહેસાસ થઈ રહ્યો છે. ત્યાં કેટલાંક વિસ્તારોમાં વચ્ચે વચ્ચે વરસાદી ઝાપટાં પણ પડી રહ્યાં છે. આ તમામની વચ્ચે ફરી એકવાર અંબાલાલ પટેલે ગુજરાતમાં કમોસમી વરસાદી પણ આગાહી કરી દીધી છે. જેને કારણે જગતનો તાત ચિંતાતૂર બન્યો છે. માવઠાના મારની ચિંતાથી જ ખેડૂતો વ્યાકૂળ બની ગયા છે.
એવામાં બીજી તરફ અલ નીનો બાદ ગુજરાતની પથારી ફેરવવા લા નીનો પણ આવી રહ્યું છે. કેટલાક વૈજ્ઞાનિક અલ નીનો બાદ લા નીનોની અસરની પણ આગાહી કરી રહ્યાં છે. ખાનગી એજન્સીએ જણાવ્યું કે, લા નીનો અસર સપ્ટેમ્બર આસપાસ જોવા મળશે. જેના કારણે સારું ચોમાસું જવાની આશા છે.
આ વખતનો ઉનાળો આકરોઃ
વર્ષ 2024 ની શરૂઆતથી જ અલ નીનો મજબૂતી સાથે વિકસિત થઈ રહ્યું છે. જે મે-જૂન સુધી રહેશે. આ વખતે સમુદ્ર અને વાયુમંડળની સ્થિતિ અલ નીનોની ઘટનાને અનુરૂપ છે. તેથી ગરમી વધારે અને ચોમાસું સારુ જશે. અલ નીનોને કારણે જ સામાન્ય કરતા વધુ સારુ ચોમાસું જોવા મળશે. હવામાન વિભાગે ચાલુ વર્ષે ભીષણ ગરમીની આગાહી વ્યક્ત કરી છે. હવામાન વિભાગ દ્વારા જણાવાયું કે, આ વર્ષે અલ નીનો કારણે ભીષણ ગરમી સહન કરવી પડશે. અલ નીનોની અસરથી સમગ્ર ભારતમાં આકરી ગરમી પડશે. વર્ષ 2024 ની શરૂઆતથી જ અલ નીનોની મજબૂત અસર જોવા મળી છે. પરંતુ આ અસર મે-જૂન મહિના સુધી સમાપ્ત થઈ જશે.
હાલ અરબી સમુદ્રમાંથી વાદળો આવી રહ્યા છે તેના કારણે લઘુત્તમ તાપમાન વધી રહ્યું છે. ગુજરાતમાં હાલ પવનની દિશા જોઇએ તો પૂર્વથી ઉત્તર પૂર્વ તરફના ફૂંકાઇ રહ્યા છે. વેસ્ટર્ન ડિસ્ટર્બન્સને કારણે સૌરાષ્ટ્ર, ઉત્તર ગુજરાત અને કચ્છમાં વાદળો બની શકે છે. ત્યારે ફેબ્રુઆરી મહિનામાં કમોસમી માવઠું ફરી એકવાર મુસીબત બનીને ત્રાટકવાનું છે. કમોસમી વરસાદની આગાહીથી ગુજરાતના ખેડૂતો પર મુસીબતના વાદળો મંડરાયા છે. જોકે, આ માવઠુ સમગ્ર ગુજરાતને નડશે.
2024 ની શરૂઆત વાતાવરણના પલટા સાથે થઈ છે. ક્યારેક ઠંડી, ક્યારેક ગરમી તો ક્યારેક વરસાદ ટપકી પડે છે. કોઈ એક સીઝન અનુભવાતી જ નથી. હાલ સમગ્ર ગુજરાતમાં સવારે ઠંડી અને બપોરે ગરમી સાથે મિશ્ર ઋતુનો અનુભવ થઈ રહ્યો છે. માંડ ઠંડી પડતી નથી, ત્યાં કમોસમી વરસાદની આગાહી આવી જાય છે. આવામાં ફરીથી આવતીકાલે ઉત્તર ગુજરાત અને કચ્છમાં માવઠાની આગાહી છે. તેના બાદ ઠંડીના વધુ એક રાઉન્ડ માટે તૈયાર રહેજો. આગામી બે દિવસ બાદ ઠંડી વધવાની શક્યતા છે.
