અચાનક શું થયું કે બેંકો આપી રહી છે લોકોને ધડાધડ નોકરી... સૌથી વધુ નોકરી આપવાનો રેકોર્ડ તોડી નાખ્યો

Bank Jobs Record: ભારતીય બેંકોએ નોકરીઓ પ્રદાન કરવામાં જબરદસ્ત પ્રગતિ નોંધાવી છે. બેંકો દ્વારા નોકરીઓ પૂરી પાડવાની ગતિ છેલ્લા એક દાયકામાં સૌથી ઝડપી રહી છે. નાણાકીય વર્ષ 2012 પછી 2023 માં બેંકિંગ ક્ષેત્રમાં લોકોને સૌથી વધુ નોકરીઓ મળી છે. બેન્કિંગ સેક્ટરના ટોચના અધિકારીઓએ નાણાકીય વર્ષ 2024માં પણ આ ટ્રેન્ડ ચાલુ રહેવાની અપેક્ષા રાખી છે. સમાચાર મુજબ નવી નિમણૂંકો માટેની સ્પર્ધા ગયા વર્ષના રેકોર્ડને વટાવી શકે છે. એટલું જ નહીં આ આંકડો અત્યાર સુધીના સર્વોચ્ચ સ્તરે પહોંચી શકે છે.

છેલ્લા 10 વર્ષમાં સૌથી વધુ આંકડો

રિઝર્વ બેંક દ્વારા જાહેર કરવામાં આવેલા આંકડા મુજબ જાહેર અને ખાનગી ક્ષેત્રની બેંકોએ મળીને ગત નાણાકીય વર્ષમાં 1,23,000 કર્મચારીઓને રોજગારી આપી હતી. આ આંકડો છેલ્લા 10 વર્ષમાં સૌથી વધુ છે. આ સમયગાળા દરમિયાન ખાનગી બેંકોએ ઝડપી નિમણૂકો કરી છે. ભરતી ખાસ કરીને ગ્રાહક ઈન્ટરફેસ અને ટેકનોલોજી કાર્યોમાં કરવામાં આવી હતી. ખાનગી બેંકોનો ઉદ્દેશ ટાયર 3 અને ગ્રામીણ વિસ્તારોમાં તેમના શાખા નેટવર્કને ઝડપથી વિસ્તારવાનો છે.

2012માં 1.24 લાખ નોકરીઓ આપવામાં આવી

નાણાકીય વર્ષ 2022ની સરખામણીમાં 2023માં કર્મચારીઓની સંખ્યામાં 61%નો વધારો થયો છે. આની અસર એ થઈ કે કર્મચારીઓની કુલ સંખ્યા વાર્ષિક ધોરણે 7.4% વધીને 1.76 મિલિયન (17.6 લાખ) થઈ. નાણાકીય વર્ષ 2011 માં 125,000 નવી નોકરીઓ સાથે બેંકિંગ ક્ષેત્રે તેની અત્યાર સુધીની સૌથી વધુ વાર્ષિક નોકરીમાં વૃદ્ધિ જોવા મળી હતી. આ પછી નાણાકીય વર્ષ 2012 માં, બેંકો દ્વારા 124,000 લોકોને નોકરી આપવામાં આવી હતી.

દરરોજ 350 નવા કર્મચારીઓ ઉમેર્યા

અહેવાલ મુજબ, ખાનગી ક્ષેત્રની દિગ્ગજ HDFC બેંક, ICICI બેંક, Axis બેંક, કોટક મહિન્દ્રા બેંક, IndusInd બેંક, IDFC ફર્સ્ટ બેંક, બંધન બેંક અને AU બેંક સહિત 15 ખાનગી બેંકોએ 2023 ના દરેક કામકાજના દિવસે લગભગ 350 નવા કર્મચારીઓની ભરતી કરી છે. જો આની સાથે બદલીના આંકડા પણ ઉમેરવામાં આવે તો દરરોજ કામકાજના દિવસે નોકરી મેળવતા કર્મચારીઓની સંખ્યા 600 થઈ જાય છે. તેના આધારે આગામી વર્ષમાં કર્મચારીઓની સંખ્યા 2011ના રેકોર્ડ આંકડાને પાર કરી શકે છે.

બેંકો ગ્રામીણ વિકાસનો લાભ લેવા માંગે છે

HDFC બેન્કના મુખ્ય અર્થશાસ્ત્રી અભિક બરુઆએ જણાવ્યું હતું કે રિટેલ લોનમાં વધારો, હાઉસિંગ ડિમાન્ડ અને અર્થતંત્રમાં તેજીના કારણે બેન્કોમાં કર્મચારીઓની માંગ વધી છે. એક્સિસ બેંકના એચઆર હેડ રાજકમલ વેમપતિ કહે છે કે દરેક બેંક ગ્રામીણ વિસ્તારોમાં વૃદ્ધિનો લાભ લેવા માંગે છે. બેંકો ઝડપથી અર્ધ-શહેરી અને ગ્રામીણ વિસ્તારોમાં પહોંચી રહી છે. બેંકોમાં નોકરીની વધતી તકો વચ્ચે બેંકો જૂના કર્મચારીઓને જાળવી રાખવામાં પણ મુશ્કેલીનો સામનો કરી રહી છે.

બેંકોમાં નોકરીમાં વધારો થવાનું કારણ

રિટેલ લોનમાં ઝડપી વધારો, હાઉસિંગ ડિમાન્ડ અને અર્થતંત્રમાં વૃદ્ધિ પણ બેન્કોમાં માનવબળની ભારે માંગ ઊભી કરી રહી છે. નાણાકીય વર્ષ 2022ની સરખામણીમાં વર્ષ 2023માં કર્મચારીઓની સંખ્યામાં 61 ટકાનો વધારો થયો છે. આગામી વર્ષમાં આ આંકડો વર્તમાન 1.23 લાખથી વધવાની ધારણા છે. વર્ષ 2023 પહેલા 2011માં 1.25 લાખ અને 2012માં 1.24 લાખ કર્મચારીઓની નિમણૂંક કરવામાં આવી હતી.