વધતી મોંઘવારી સામે ટકી રહેવા અને વ્યવસાય ટકાવી રાખવા સરકાર દ્વારા અનેક રીતે સહાયો પૂરી પાડવામાં આવી રહી છે. આમ જોવા જઇએ તો કેન્દ્ર સરકાર ગરીબોના કલ્યાણ માટે અનેક યોજનાઓ ચલાવી રહી છે. જેમાંથી એક પીએમ સ્વાનિધિ યોજના છે, જેના હેઠળ ગરીબ શેરી વિક્રેતાઓને તેમનો વ્યવસાય ફરીથી શરૂ કરવા માટે લોન આપવામાં આવી રહી છે.
તમને જણાવી દઈએ કે સ્ટ્રીટ વેન્ડર્સને વર્કિંગ કેપિટલ લોનની સુવિધા આપવા માટે સ્વાનિધિ સ્કીમ 1 જૂન, 2020ના રોજ શરૂ કરવામાં આવી હતી, આ સ્કીમ એવા વિક્રેતાઓ માટે લાવવામાં આવી હતી જેમનો બિઝનેસ કોરોના મહામારી દરમિયાન અટકી ગયો હતો. સરકારની આ યોજના તેમને તેમનો વ્યવસાય ફરીથી શરૂ કરવામાં મદદ કરી રહી છે. અગાઉ સ્ટ્રીટ વેન્ડર્સ ખાનગી અનૌપચારિક સંસ્થાઓ પાસેથી ઊંચા વ્યાજ દરે લોન લેતા હતા.
અત્યાર સુધીમાં કરાયું 3.5 હજાર કરોડ રૂપિયાનું વિતરણ
તાજેતરમાં, કેન્દ્રીય આવાસ અને શહેરી બાબતોના પ્રધાન હરદીપ સિંહ પુરીએ જણાવ્યું હતું કે PM સ્વાનિધિ યોજના હેઠળ અત્યાર સુધીમાં 3500 કરોડ રૂપિયાથી વધુ શેરી વિક્રેતાઓને વહેંચવામાં આવ્યા છે. તેમણે કહ્યું કે પીએમ સ્વાનિધિ યોજના હેઠળ, 53.7 લાખ પાત્ર અરજીઓ પ્રાપ્ત થઈ છે, 36.6 લાખ લોન મંજૂર કરવામાં આવી છે, અને 33.2 લાખ લોનનું વિતરણ કરવામાં આવ્યું છે. આ યોજના હેઠળ અત્યાર સુધીમાં 3,592 કરોડ રૂપિયાનું વિતરણ કરવામાં આવ્યું છે અને લગભગ 12 લાખ શેરી વિક્રેતાઓએ તેમની પ્રથમ લોન ચૂકવી દીધી છે.
સબસિડી
પીએમ સ્વાનિધિ યોજનાનો મુખ્ય ઉદ્દેશ્ય શેરી વિક્રેતાઓને તેમનું કામ ફરીથી શરૂ કરવા માટે લોન આપવાનો છે. જે અંતર્ગત 10 હજાર રૂપિયા સુધીની લોન આપવામાં આવે છે. લોનની રકમ એક વર્ષની અંદર હપ્તામાં ચૂકવી શકાય છે. વિક્રેતાઓને સમયસર લોનની ચુકવણી પર 7 ટકા વાર્ષિક સબસિડી આપવામાં આવે છે. બીજી તરફ, વેન્ડર પ્રથમ વખત નિર્ધારિત સમયની અંદર લોનની ચુકવણી કરે પછી, બીજી વખત 20 હજાર રૂપિયા સુધીની લોન લઈ શકાય છે અને તે જ રીતે ત્રીજી વખત 50 હજાર રૂપિયાની લોન લઈ શકાય છે. . આ યોજના હેઠળ દંડની કોઈ જોગવાઈ નથી.
અરજી કરવાની રીત
આ યોજનામાં અરજી કરવાં માટે તમારે સૌપ્રથમ PM સ્વાનિધિની સત્તાવાર વેબસાઇટ પર જવાનું રહેશે. જો તમે પહેલી વાર લોન લઈ રહ્યા છો તો Apply loan 10k પર ક્લિક કરો. તેવી જ રીતે, જો તમે 20 હજાર અથવા 50 હજાર રૂપિયાની લોન માટે પાત્ર છો, તો અનુક્રમે લોન Apply loan 20k, Apply loan 50K ના વિકલ્પ પર ક્લિક કરો, જે પછી તમારે પૂછવામાં આવેલી વિગતો ભરવાની રહેશે.
