વધતી જતી મોંઘવારી વચ્ચે સામાન્ય લોકોને ફરી આંચકો લાગવાનો છે. આવનારી 18 જુલાઈથી તમારે હવે રોજિંદી ઘણી વસ્તુઓ અને સેવાઓના બદલામાં વધુ પૈસા ચુકવવા પડશે. GSTની 47મી બેઠક બાદ નાણામંત્રી નિર્મલા સીતારમણે આ જાણકારી આપી. નાણામંત્રીએ કહ્યું કે 18 જુલાઈથી કેટલીક નવી પ્રોડક્ટ્સ અને કેટલીક ચીજવસ્તુઓ અને સેવાઓ પર જીએસટીના દરો વધશે. આ વસ્તુઓના નવા દર 18મીથી લાગુ થશે. ચાલો જાણીએ કઈ વસ્તુઓ સસ્તી થઈ રહી છે અને કઈ મોંઘી?
સરકાર દ્વારા આપવામાં આવી જાણકારી
પનીર, લસ્સી, છાશ, પેકેજ્ડ દહીં, ઘઉંનો લોટ, અન્ય અનાજ, મધ, પાપડ, માંસ અને માછલી (ફ્રોઝન સિવાય), પફ્ડ ચોખા અને ગોળ જેવા પ્રી-પેકેજ લેબલવાળા કૃષિ ઉત્પાદનો 18 જુલાઈથી મોંઘા થશે. એટલે કે તેમના પરના ટેક્સમાં વધારો કરવામાં આવ્યો છે. હાલમાં, બ્રાન્ડેડ અને પેકેજ્ડ ખાદ્ય ચીજો પર 5 ટકા GST વસૂલવામાં આવે છે, જ્યારે અનપેક્ડ અને લેબલ વગરની વસ્તુઓ કરમુક્ત છે. ચાલો જાણીએ 18 જુલાઈથી કઈ વસ્તુ સસ્તી થશે અને કઈ મોંઘી થશે?
આ વસ્તુઓ થશે મોંઘી
- ટેટ્રા પેક દહીં, લસ્સી અને બટર મિલ્ક મોંઘા થશે, કારણ કે 18 જુલાઈથી તેના પર 5% GST લાગશે, જે અગાઉ લાગુ નહોતું.
- ચેકબુક ઇશ્યૂ કરવા પર બેંકો દ્વારા લેવામાં આવતી ફી પર હવે 18% GST લાગશે.
- 5,000 રૂપિયા (નોન-ICU)થી વધુની હોસ્પિટલમાં ભાડે આપેલા રૂમ પર 5 ટકા GST વસૂલવામાં આવશે.
- આ સિવાય નકશા અને એટલાસ સહિતના શુલ્ક પર હવે 12 ટકાના દરે GST લાગશે.
- 1,000 રૂપિયા પ્રતિ દિવસથી ઓછા ભાડે હોટલના રૂમ પર 12 ટકા GST વસૂલવામાં આવશે.
- એલઇડી લાઇટ્સ પર LED લેમ્પ પર 18 ટકા GST લાગશે જે અગાઉ લાગુ નહોતું.
- બ્લેડ, પેપર સિઝર્સ, પેન્સિલ શાર્પનર, ચમચી, ફોર્ક્ડ સ્પૂન, સ્કિમર અને કેક-સર્વર વગેરે પર અગાઉ 12 ટકા જીએસટી લાગતો હતો, હવે 18 ટકા જીએસટી લાગશે.
આ વસ્તુઓ થશે સસ્તી
- 18 જુલાઈથી રોપ-વે દ્વારા મુસાફરો અને માલસામાનનું પરિવહન સસ્તું થશે, કારણ કે તેના પર જીએસટી દર 18 ટકાથી ઘટાડીને 5 ટકા કરવામાં આવ્યો છે.
- સ્પ્લિન્ટ્સ અને અન્ય ફ્રેક્ચર ડિવાઇસ, બોડી પ્રોસ્થેસિસ, બોડી ઇમ્પ્લાન્ટ્સ, ઇન્ટ્રા-ઓક્યુલર લેન્સ પર GST 12 ટકાથી ઘટાડીને 5 ટકા કરવામાં આવ્યો છે.
- ઈંધણના ખર્ચથી માલસામાન વહન કરતા ઓપરેટરોના ભાડા પર GST 18 ટકાથી ઘટાડીને 12 ટકા કરવામાં આવશે.
- સંરક્ષણ દળો માટે આયાત કરવામાં આવતી અમુક વસ્તુઓ પર IGST લાગુ થશે નહીં.
