SBI Scheme: સ્ટેટ બેંક ઓફ ઈન્ડિયા (SBI) એ ગ્રાહકો માટે નવી સુવિધા શરૂ કરી છે. બેંકના ગ્રાહકો તેમના આધાર કાર્ડ નંબર દ્વારા વિવિધ સામાજિક સુરક્ષા યોજનાઓ માટે નોંધણી કરાવી શકે છે. બેંક દ્વારા 25 ઓગસ્ટે જારી કરવામાં આવેલી પ્રેસ નોટમાં આ માહિતી આપવામાં આવી હતી. SBI ગ્રાહકોને સામાજિક સુરક્ષા યોજનાઓ માટે નોંધણી કરાવવા માટે પાસબુકની જરૂર નથી.
નોંધણી માટે આધાર કાર્ડ જરૂરી
હવે SBI ગ્રાહક સેવા કેન્દ્રો (CSP)ની મુલાકાત લેતા ગ્રાહકોને સામાજિક સુરક્ષા યોજનાઓમાં નોંધણી માટે આધાર કાર્ડની જરૂર પડશે. SBI ની એડવાન્સ સિસ્ટમ નોંધણી પ્રક્રિયાને ઝડપી બનાવે છે. આનાથી આ કામ પહેલા કરતા વધુ સુવિધાજનક બનશે. પ્રેસ નોટમાં જણાવવામાં આવ્યું હતું કે SBIના ગ્રાહક સેવા કેન્દ્રો (CSP) એ કિઓસ્ક છે જે SBI ગ્રાહકોને વ્યવહારો કરવા માટે સુવિધા પૂરી પાડે છે.
પસંદગીની સામાજિક સુરક્ષા યોજનાઓ
પ્રધાનમંત્રી જીવન જ્યોતિ વીમા યોજના (PMJJBY)
પ્રધાનમંત્રી સુરક્ષા વીમા યોજના (PMSBY)
અટલ પેન્શન યોજના (APY)
આ અંગે એસબીઆઈના ચેરમેન દિનેશ ખરાએ જણાવ્યું હતું કે અમારો ઉદ્દેશ્ય એવી કોઈપણ પ્રકારની બાબતોને દૂર કરવાનો છે જે નાણાકીય સુરક્ષાની પહોંચને અવરોધે છે. આ પગલા પછી, સામાજિક સુરક્ષા યોજનાઓના કવરેજમાં નોંધપાત્ર વધારો થવાની અપેક્ષા છે, જે સુનિશ્ચિત કરશે કે આ યોજનાઓનો લાભ એવા લોકો સુધી પહોંચે કે જેમને તેની સૌથી વધુ જરૂર છે. આનો હેતુ પેપરવર્ક ઘટાડીને ગ્રાહકોને સુવિધા આપવાનો છે.
પ્રધાનમંત્રી જીવન જ્યોતિ વીમા યોજના (PMJJBY) એ જીવન વીમો છે. 18 થી 50 વર્ષની વચ્ચેના ખાતાધારકો આ પોલિસી ખરીદી શકે છે. ડિપાર્ટમેન્ટ ઑફ ફાઇનાન્શિયલ સર્વિસિસની વેબસાઇટ અનુસાર તેનું લાઇવ કવર 2 લાખ રૂપિયા છે અને વાર્ષિક પ્રીમિયમ 436 રૂપિયા છે. આ પ્રીમિયમ કોઈપણ વ્યક્તિના બેંક ખાતામાંથી ઓટો ડેબિટ થાય છે.
