આંધી વંટોળ અને કરા સાથે વરસાદની આગાહી, જાણો કયા જિલ્લામાં વરસાદનું ઓરેંજ એલર્ટ

રાજસ્થાનમાં સર્જાયેલી અપર એર સાયક્લોનિક સિસ્ટમને કારણે રાજ્યમાં ભરઉનાળે કરા, વંટોળ સાથે વરસાદ વરસી રહ્યો છે. શનિવારની રાતથી જ ગુજરાતના અનેક વિસ્તારોના વાતાવરણમાં પલટો આવ્યો હતો. વીજળીના કડાકા ભડાકા સાથે ક્યાંક ધોધમાર તો ક્યાંક સામાન્ય વરસાદ પડ્યો હતો. આ સાથે ઉત્તર ગુજરાતના કેટલાક ભાગોમાં કરા પણ પડ્યા હતા. ત્યારે આજે પણ રાજકોટ, મહેસાણા સહિત અનેક જિલ્લાઓમાં વંટોળ, ગાજવીજ સાથે કરા અને વરસાદનું ઓરેન્જ એલર્ટ આપવામાં આવ્યું છે. જ્યારે અમદાવાદ અને વડોદરા સહિતના કેટલાક વિસ્તારોમાં છૂટાછવાયા સ્થળો પર વંટોળ, વરસાદ, મેઘગર્જનાની ચેતવણી આપવામાં આવી છે.

હવામાન વિભાગે આપેલી માહિતી પ્રમાણે, આજે પાંચમી તારીખે દ્વારકા, પોરબંદર, જામનગર, સુરેન્દ્રનગર, અમદાવાદ, બોટાદ, અમદાવાદ, ગાંધીનગર, વડોદરા, ભરૂચ, નર્મદા, સુરત, તાપી, નવસારી, ડાંગ અને વલસાડમાં છૂટાછવાયા સ્થળો પર મેઘગર્જનાની ચેતવણી આપવામાં આવી છે. ગુજરાતમાં ભરઉનાળે વરસાદી અષાઢ જેવો માહોલ સર્જાયો છે. હવામાન વિભાગે આગામી સાત દિવસ માટે વરસાદ અને વંટોળની આગાહી કરી છે. અનેક વિસ્તારોમાં ઓરેન્જ એલર્ટ છે અને 60 kmph પવનની શક્યતા છે.

હવામાન વિભાગે આપેલી માહિતી પ્રમાણે, સોમવારે એટલે આજે સામાન્ય વીજળીના કડાકાની વોર્નિંગ છે. બનાસકાંઠા, સાબરકાંઠા, પંચમહાલ, અરવલ્લી, પાટણ, મહેસાણા, અરવલ્લી, મહીસાગર, પંચમહાલ, દાહોદ, છોટાઉદેપુરમાં તથા કચ્છ, મોરબી, રાજકોટ, અમરેલી, જુનાગઢ, ગીરસોમનાથ, ભાવનગરમાં ઓરેન્જ એલર્ટ છે. અહીં ગાજવીજ સાથે કરા પડવાની ચેતવણી છે. આજે 60 kmph ની ઝડપે પવન ફૂંકાવાની શક્યતા છે.

હવામાન વિભાગના અમદાવાદ કેન્દ્રના મોસમ વૈજ્ઞાનિક, રામાશ્રય યાદવે ગુજરાતનું હવામાન આગામી સાત દિવસ કેવું વાતાવરણ રહેશે તે અંગે જણાવ્યું છે. જેમાં તેમણે જણાવ્યું છે કે, હાલ સાયક્લોનિક સર્ક્યુલેશન સક્રિય થતા વરસાદની શક્યતા છે.

ભારતીય હવામાન વિભાગ (IMD)એ આગાહી કરી છે કે આગામી દિવસોમાં ગુજરાત-રાજસ્થાનથી, બિહાર-ઓડિશા સુધી ભારતના અનેક રાજ્યો અને પ્રદેશોમાં ભારે વાવાઝોડા, વીજળી, કરા પડવાની અને ભારે વરસાદ પડી શકે છે.

હવામાન નિષ્ણાત અંબાલાલ પટેલ 8 મે સુધી વરસાદી સિસ્ટમની અસર ગુજરાતના વાતાવરણ પર જોવા મળશે તેમ જણાવ્યું છે. બે દિવસ 50 થી 60 કિલોમીટરની ઝડપે પવન ફૂંકાશે અને બે દિવસ બાદ એટલે કે 7 અને 8 મેના રોજ પવનની ગતિ વધીને 70થી 80 કિલોમીટરની ઝડપે પવન અને ગાજવીજ સાથે ભારેથી અતિભારે વરસાદ થવાની આગાહી છે.

શનિવારે રાતથી અમદાવાદ અને ગાંધીનગર સહિત રાજ્યના અનેક ભાગોના વાતાવરણમાં પલટો આવ્યો હતો. ખાસ કરીને ઉત્તર ગુજરાતના બનાસકાંઠા, સાબરકાંઠા, અરવલ્લી, મહેસાણા, પાટણના અનેક વિસ્તારોમાં તેમજ સુરેન્દ્રનગર અને ગાંધીનગર વીજળીના કડાકા ભડાકા સાથે વરસાદ વરસ્યો હતો