30 જૂનથી બદલાઇ જશે UPI પેમેન્ટની રીત, જાણો તમને શું લાભ થશે?
ભારતમાં ડિજિટલ પેમેન્ટને વધુ સુરક્ષિત અને વિશ્વાસપાત્ર બનાવવાના હેતુથી, નેશનલ પેમેન્ટ્સ કોર્પોરેશન ઓફ ઈન્ડિયા (NPCI) એ UPI વ્યવહારો માટે મહત્વપૂર્ણ નવા નિયમો જારી કર્યા છે. આ નિયમો આગામી ૩૦ જૂન, ૨૦૨૫ થી અમલમાં આવશે, જેના પરિણામે UPI ટ્રાન્ઝેક્શનની સમગ્ર પદ્ધતિમાં ફેરફાર જોવા મળશે. આ બદલાવથી યુઝર્સને ઓનલાઈન છેતરપિંડીથી બચવામાં મદદ મળશે અને ડિજિટલ પેમેન્ટ પર તેમનો વિશ્વાસ વધશે.
અત્યાર સુધી, જ્યારે આપણે UPI દ્વારા કોઈને ચુકવણી કરીએ છીએ, ત્યારે મોબાઈલ એપ પર એ જ નામ દેખાય છે જે આપણે આપણા ફોનમાં સેવ કર્યું હોય છે. આના કારણે ક્યારેક છેતરપિંડીની શક્યતા વધી જતી હતી, કારણ કે સ્કેમર્સ નકલી નામો અથવા ફોટાનો ઉપયોગ કરીને લોકોને છેતરી શકતા હતા. પરંતુ હવે આવું નહીં થાય.
નવા નિયમ મુજબ, જ્યારે પણ તમે કોઈને UPI ચુકવણી કરશો - પછી તે QR કોડ સ્કેન કરીને હોય, મોબાઈલ નંબર દાખલ કરીને હોય કે UPI ID દાખલ કરીને હોય - તમને ફક્ત તે વ્યક્તિનું સાચું નામ જ દેખાશે જે બેંકમાં નોંધાયેલું છે. આનાથી તમે યોગ્ય વ્યક્તિને પૈસા મોકલી રહ્યા છો કે નહીં તેની ખાતરી કરવી અત્યંત સરળ બનશે
આ નવો નિયમ બે પ્રકારના વ્યવહારોને લાગુ પડશે: વ્યક્તિથી વ્યક્તિ (P2P): જ્યારે એક વ્યક્તિ બીજી વ્યક્તિને ચુકવણી કરે છે. વ્યક્તિથી વેપારી (P2M): જ્યારે દુકાનદાર, કાફે અથવા કોઈપણ સેવા માટે ચુકવણી કરવામાં આવે છે. દરેક વખતે ટ્રાન્ઝેક્શન કરતા પહેલા, એપ્લિકેશન આપમેળે બેંકમાં નોંધાયેલ રીસીવરનું નામ બતાવશે.
આ નવી સિસ્ટમના અનેક ફાયદા છે: વાસ્તવિક નામ દેખાતાં ચુકવણી મોકલતા પહેલાં ઓળખવાનું સરળ બનશે, જે છેતરપિંડી પર નિયંત્રણ લાવવામાં મદદ કરશે. હવે ભૂલથી બીજા કોઈને પૈસા ટ્રાન્સફર થવાનું જોખમ ઓછું થશે. આ ફેરફારથી લોકોને ડિજિટલ પેમેન્ટ અંગે વધુ વિશ્વાસ મળશે.
NPCI એ યુઝર્સને સાવચેતી રાખવા અપીલ કરી છે: દરેક વખતે ચુકવણી કરતા પહેલા, એપ્લિકેશન પર દર્શાવેલ નામ કાળજીપૂર્વક વાંચો. જો નામ અજાણ્યું લાગે અથવા કંઈક ખોટું લાગે તો ચુકવણી કરશો નહીં. કોઈપણ અજાણ્યા QR કોડને સ્કેન કરવાનું ટાળો. કોઈપણ સમસ્યાના કિસ્સામાં, તાત્કાલિક તમારી બેંકની હેલ્પલાઇન અથવા ચુકવણી એપ્લિકેશનનો સંપર્ક કરો.
